teitl : ‘ FFA COFFI PAWB AM BYTH ’
- casgliad o ganeuon coll 1986 – 1992

DYDDIAD RHYDDHAU : 16eg o AWST

FFA COFFI PAWB – yn fras ( iawn )

Mae “FFA COFFI PAWB AM BYTH” yn casglu ynghyd, mewn pentwr, ddetholiad o ganeuon a recordiwyd gan FFA COFFI PAWB rhwng 1986 ac 1992.

Gan fod pethwmbreth o’r tapiau gwreiddiol ar goll mewn mannau tywyll bu’n rhaid defnyddio amrywiaeth o wahanol fformatiau ( casetiau plastig, feinil o wahanol feintiau, siâp a chyflwr, tapiau DAT a mini-discs ) er mwyn gwireddu’r casgliad yma.

FFA COFFI PAWB oedd : Dewi Emlyn ( gitar fâs), Gruff Rhys
( gitar a llais ), Dafydd Ieuan ( drymiau ) a Rhodri Puw ( gitar ).

Yn ystod gyrfa Ffa Coffi Pawb, fe gariwyd eu caneuon gan sawl ffrwd – gan gynnwys label ‘Casetiau Huw’ , tair albym i ‘Recordiau Ankst’ , amryw o recordiau 12” ynghyd â’u label nhw eu hunain – ‘Siwgwr’.
Chwalodd y band yn ystod Haf 1993 – rai misoedd wedi rhyddhau “Hei Vidal”.

Gyda threigl amser fe symudodd aelodau’r band i sawl cyfeiriad cerddorol :-
Ffurfiodd Dafydd Ieuan a Gruff Rhys ‘Super Furry Animals’ gyda Huw Bunford a Guto Pryce ( gynt o ‘U-Thant’ ) a Cián Ciaran ( gynt o Wwzz ).
Ymhen amser ymunodd Rhodri Puw gyda Gorky’s Zygotic Mynci – gan chwarae ar “ How I Long To Feel That Summer In My heart”, “The Blue Trees” a “ Sleep / Holiday” .
Mae e hefyd yn rhan o Psycho VII.
Bu Dewi Emlyn yn teithio’n galed ac yn eang - yn gweithio tu ol i’r llenni gyda bandiau fel Gorky’s Zygotic Mynci, Super Furry Animals, Mogwai a Cornelius.

Rhywle rhwng ‘Hwgr Grawth Og’ , ‘Y Brawd Houdini’, ‘White light White Heat’, ‘Maffia Mr Huws’ a chysgod Eryri - rhywle fanna ma’ Ffa Coffi Pawb. Beth sydd i ddisgwyl gan fand a esblygodd wrth droed y chwareli rhwng môr a mynydd mewn pentref Cymreig a Chymraeg gyda’r enw Hebraeg, Bethesda?

I fod yn bersonol. Roedd trefnu gig ysgol i Ffa Coffi Pawb yn creu roblemau. Creu posteri a dosbarthu’r posteri yna o gwmpas tref Llanr wst ac yn yr ysgol..a’r posteri yna’n dweud ‘Ffa Coffi Pawb’! Tri peth dw i’n cofio am y gig. Yn gyntaf cwyn gan y band - roeddwn wedi cyfaddawdu trwy’u hysbysebu nhw fel “Ffa Coffi”. Penaeth yr ysgol - yn tynnu sylw at y perygl y gallai pobl gam-ddehongli enw’r band fel rheg at y byd a’r betws, a finne’n awgrymu’n gynnil mai’i ddychymyg e’ oedd ar fai.
Y band ( mewn cyfnod pan roedd pob gig yn werthfawr iddynt ), yn bygwth tynnu allan o’r noson ! Wedyn, y band ar lwyfan. Dim ymdrech i gyfaddawdu. Ar ôl hanner dwsin o ganeuon llawn cynnwrf di-reol gyda llinnyn yn ymestyn o Galiffornia trwy Glasgow a Chaergybi i Fangor Ucha’ a Nant Ffrancon... gadael y llwyfan gyda’r gitarau ar lawr a feedback swnllyd yn llenwi’r lle. Neb yn siwr a oedd y set wedi dod i ben neu beidio.
A’r trydydd peth ? Y sicrwydd bod y band yma’n mynd i lwyddo. Dw i ddim yn cofio pwy oedd prif fand y noson.

Llwyddiant. Ar awst 4ydd, 1987, cafodd FfCP £20 am chwarae yn Eisteddfod Porthmadog - y band cyntaf ar y llwyfan cyn Yr Orsedd, Edrych
Am Jiwlia, U-Thant, Tynal Tywyll a Y Cyrff yn headleinio!
Erbyn hynny roeddent wedi rhyddhau y caset cyntaf - “Torrwyr Beddau Byd-Eang Cyf.” Roedd y swreal yna o’r cychwyn - ac roedd yr hiwmor du’n
ganolog i fywyd y band. Dim syndod yn ddiweddarach yng ngyrfa’r band bod pethau od yn digwydd - “Dw i’n troi’n ffrwyth “. Digon teg.

Swreal. Anelu at lwyddiant trwy ryddhau “Octapws” y caset 3-chân ar label Casetiau Huw. Cyfweliad gyda Huw Gwyn ar Pier Bangor yn datgelu mai caset Ffa Coffi Pawb a label Casetiau Huw oedd dyfodol y sîn roc yng Nghymru. Adolygydd yn y cylchgrawn tanddaearol ‘Llmych’ yn deud y cyfan....”ces i sioc - mae’r caset yma’n dda - na - yn dda iawn. Falle bod nhw’n dechrau cymryd eu hunain o ddifri!”.
Efallai.
Dilyn hyn gyda Dafydd a Gruff yn ymuno gyda Dewi Gwyn ( Y Sefydliad ) a Huw Gwyn i ail-greu “Trip Dewi Emlyn” ac yna Ffa Coffi Pawb yn rhyddhau’r caset 10-cân, “Dalec Peilon” ( Casetiau Huw ).

Diolch byth bod Ankst wedi dod i’r golwg i sicrhau cynulleidfa ehangach i ganeuon Ffa Coffi Pawb trwy ryddhau ‘Clymhalio’. ‘Cymryd Y Pys’ a ‘Hei Vidal’.

Os oes un peth mae pob band yn anelu ato - y peth hwnnw yw ei swn ei hunan. O’r cychwyn cyntaf roedd y gymysgedd o gerddoriaeth a ddaeth danenw ‘Ffa Coffi Pawb’ yn wahanol. Nid jest y gerddoriaeth ond y defnydd o swn y geiriau a’r gallu I ddefnyddio clapio dwylo, canu harmoni, gitarau jangli, geiriau di-eiriau a tiwns.
Rwy’n herio chi i wrando ar y casgliad yma heb dorri allan i ganu gyda’r band ar rai o’r caneuon. Glynodd y band at fynnu bod cynulleidfaoedd yn
derbyn bod ganddynt weledigaeth amgenach na’r cyffredin ond roedd y weledigaeth yma’n cynnwys creu tiwns sy’n aros yn y côf ac yn mynnu gwthio I fewn i’r ymennydd amseroedd od o’r dydd - a’r nos. Y gwir amdani yw bod y caneuon wedi goroesi oherwydd eu bod uwchlaw cyfnod a lle.
Un peth yw benthyg syniadau o gerddoriaeth sy’n ymestyn dros dri degawd - peth arall yw’r gallu i ddewis y syniadau gorau a chlymu i fewn ddychymyg i greu rhywbeth unigryw.
Dyna beth oedd, ac yw, llwyddiant Ffa Coffi Pawb.
Dyna pam fod y gerddoriaeth yma’n goroesi amser.

Ar ddiwedd y gig yn Llandudno, nos Sul Awst 6ed, 1989 - Llwybr Llaethog, Ffa Coffi Pawb a Blodau Cyntefig - rhuthro at y band i ddweud bod nhw’n ffantastig.
Rhodri Puw yn edrych yn syth i fy ngwyneb - “ Ble ma’r arian ?”!
Digon teg - Lluchia dy fflachlwch drosta I, gafael yn dynn ac off â ni i Sacramento - ond paid anghofio’r Valium.

- Toni Schiavone ( Mai 2004 )

MANYLION Y CANEUON